განვაგრძობ მღერას

ვერ ვიტყვი ვერას? განვაგრძობ მღერას,
ჩემო ტოლ-სწორო მოგეფერებით,
კიდევ ვერა ვთქვი? კიდევ ვიმღერებ,
რომც გადახუნდენ ყველა ფერები.

ნუ გენატრებათ კარგი ცხოვრება,
კარგი ცხოვრება სწორედ ეს არის,
დაუღალავი შრომა და მღერა,
როცა მიზანი გათბობს მზესავით.

ის გიხაროდეს როცა გწყურია,
წყურვილი არის სწორედ სიცოცხლე,
გზა მანამ გართობს სანამ მიდიხარ,
და არა როცა მიხვალ, იცოდე.

ის ვერ გაგათბობს რომ გმსახურობენ,
მით ვერ დატკბები რაიც ბევრი გაქ,
მხოლოდ როდესაც ვინმეს მსახურებ
მაშინ გათბები გულის ფსკერიდან.

მადლობა თქვენდა, ვისაც გჭირდებით,
თქვენით თუ არის ეს გზა კეთილი,
თქვენ მაჯილდოვებთ თავდავიწყებით,
თქვენს მიცვლით წერტილს მრავალწერტილით…